50% عمال و فلاحين

واحد كـده عقبـال أمالتـك

وارث حوالــى 200 فدان

غير العمارات مش زي بختك

زفت  هباب زي القطران

حبّ في يوم يرشح نفسه

منه فخر ومنه مكسب

قام لبس فلاح وأمه

قالت له آه منك يا تعلب

الكلام ده بعد ما رش

هنا وهنا لزوم إنتخابات

وزي ولد الكوتشينه قش

واسمه جه في الراديوهات

.......

بعد إجتماع والذي منه

يطلع علي فندق جنان

يخلع هدوم النصب عنه

وبيه يعود زي ما كان

الجرسون لاحظ صاحبنا

قام كده إستعجب شويه

وسأله ليه أنت ياسيدنا

بتلبس الشال والطاقيه

قال له أصل أنا ممثل

الجرسون قال ياسلام

ما جاش علي بالي إنى أسأل

السيما دي بنت حرام

نهايته إسم الفيلم ايه

ويا ترى أنت اللي فيه

بطل كده ولا انت ايه

يعني الدور اللي عاطيه

قام ضحك البيه وقال

طبعاً بطل أمال مزاح

وطالع ايه في الدور يابيه

قال إختاروا لي دور فلاح